Daryeel Magazine
Josh Waitzkin oo qoray buugga la yidhaa The Art of Learning waa qof aad u yaqaan habka xirfadaha cusub laysu baro loogana gaadho heer sare. Isagoo 6 jir ah ayuu bilaabay inuu ciyaaro chess, markuu 16 jir noqdayna wuxuu gaadhay heerka loo yaqaan International Master. Taariikhdiisan cajiibka ah Hollywood baa ka samaysay filin la yidhaa: Searching for Bobby Fischer. Mar danbe, intuu calaamka chess iskaga baxay ayuu bilaabay inuu is baro ciyaarta xeel-dagaal (martial art) ee Tai Chi ilaa uu 2004-kii noqday horyaalka caalamka.
The Art of Learningwaa buug heer sare ah oo aad ugu haboon dadka jecel inay kartidooda dhisaan oo naftoodana horumariyaan.
Hoos waxaan kusoo koobay 5 talo oo aan ka faaiday buuggan:
1. Caqliyadda growth-mindset yeelo
Growth mindset waa magac ay bixisayprofessor Carol Dweck oo qortay buugga la yidhaa: Mindset. Dadka haysta growth-mindset waxayaaminsanyiin in haday dadaalaan ay kartiday u dhasheen sii dhisi karaan. Halkay dadka haysta fixed-mindset aaminsanyiin in dadaalku wax saamayn ah ku lahayn kartida loo dhasho. Markaad yeelatid growth-mindset waxaadogaanaysaa inaad heerkaad maanta tiigsanaysid aad biri gaadhi kartid hadaad ku dadaashid. Waliba waxaad ka adkaanaysaa diidmada aad naftaada kala kulantid markay ku tidhaa: ma samayn kartid!, kuma fiicnid adigu!
2. Go’aanso inaad heer sare gaadhid
Ilaa heerkee baad rabtaa inaad gaadhid? Qof ku tala jira inuu heer-khabiir tiigsado iyo mid raba inuu meel dhexe gaadho isku dadaal loogama baahna. Qofka raba inuu heer sare gaadho waa inuu la yimaado dadaal iyo tababar tayo sare leh.
3. Waxaad ku fiicantay xoogga saar
Wax kasta kuma fiicnaan kartid oo qof walba wuxuu leeyay waxyaabo uu ku fiicanyay iyo waxyaabo uu ku xunyay. Markaa intaad dedaal ku lumin lahayd baabiinta cilladahaaga waa inaad awoodahaaga sii xoojisid. Hadaad yeelatid karti heer sare ah, cilladahaaga lama arki doonaba.
4. Kartidaada si joogto ah u dhis
Maalin walba heerkay kartidaadu shalay joogtay waa inaad kor uga sii qaadid. Inkastoo aad cabsi badan dareemi doontid hadana waa lagama maarmaan inaad goobtaad la qabsatay ka sii dhaqaaqdid. Kartidaad dhisaysid marka hore mabaadi’da aasaasiga u ah baro kadibna maalin kasta kartidaadu si joogta ah haw kororto.
5. Guusha guuldareysi baa ka horeeya
Intaanad himilodaada ku guulaysan waa lama huraan inaad guuldareysi la kulantid. Laakiin, waa inaanad u joojin oo aad jidka sii haysatid ilaa intaad guusha soo hooyinaysid. Markaad qalad ku dhacdid, wax ka baro kana gudub. Qaladka ugu horeeya waa laga soo kaban karaa ee waxaa halis ah qaladka 2aad 3aad 4aad ilaa heer qaladba qalad kuu sii dhiibo.
Dr. Ahmed Hussein (Adhibadane)
@adhibadane
