Daryeel Magazine
Dhammaadka bisha guurka ugu horreysa ama ka horba, lammaanaha dhawaan aqal galay waxaa soo kulaala weydiimo arrinkooda ku qotama iyo kuwo kale ba. Waxaana ugu doorroon in ay Uur-kujir ku hubsadeen uurka hooyada.
Jawaabta weydiintaa hore waxaa laga yaabaa inay lur ku hayso inta badan dadka. Fidro kamid ah fidrooyinka Ilaahay dadka ku abuuray weeye helidda fir sal-ballaaran, jeclaanta wanaagga dunida iyo quruxdeeda. [ Hantida iyo dhashu waa muunadda dunida] Alle sarrey’e dhasha waxa uu ku tiriyey muhashooyinka dadka loo qurxiyey.
Ha se yeeshee, fursad ma siinnay nafta ay uga fekerto dhashu inay tahay muhasho baraare xigi doono ama isu rogi doonta dhibaato adduun iyo mid aakhiro?!
Dhabtii waxaa wax laga xumaado ah dhalitaanku in wax la dhalo uun noqdo yoolasha nolosha ugu waaweyn qaarkeen.
Waa miskiin dhabtii kan aaminsan Nebiga NNKH in uu ina ka doonayo keliya inaan noqonno ummad qotodheer oo ballaaran sida daad-xoorta, markuu yiri “Is-guurada, is-badiya, is-ballaariya, ummadaha kale ayaan qiyaamaha idinku faanayaa”
Maya, Ilaah baan ku dhaartay’e, majirto dan uu nebi Alle ugu faano tiro aan tayo ka dhex-lahayn ummadaha, dantooduna gacanta ugu jirto madaxda Ruushka, Maraykan iyo Israa’iil. Taa beddelkeed nebigu waxa uu doonayaa inuu ku faano ummad hoggaamisa dunida ku dhaqda caddaalad iyo shareeco; [isla-markaana] gudata shaqadii loo xilsaaray.
Intaadan ku fekerin inaad aabbe noqoto, ma ka fekertay ma se dejisay waxaad ilmahaaga u qaban doontid? Awood ma u leedahay inaad tusaale u noqotid?
Maxaad u huri doontaa si uu gadaashaa hanaqaad u noqdo, mise waxaad ka tegi doontaa dameeri dhaan-racday nolosha gabiyadeeda dalanbaabi ku ah. Mise waxaad ka yeeli doontaa qof dhib-kastoo jira hillinkiisa cagta saara? Ma waxaad ka keensan magacaaga iyo jiritaankaagu in uu ku faano mise waxaad ku dhigi doontaa ku abtirsashadaada iin daba joogta halka uu cag-dhigo ba?
Akhristahayga milgaha lehoow, ha noqon aabbe haddaadan awoodin caruurtaada inaad u fidiso inta ugu yar asaasiyaadka nolosha. Iyagu baahi uma qabaan in ay jidadka la wareegaan mac-macaan ay ku dawarsanayaan socotada, baahi sidoo kale uma qabaan xoodashada lafaha dhabarkooda jilicsan shaqaday u hayaan dadka intooda manaxayaasha awgeed. Halka waddamadeenuna baahi u qabin sare u kac fakhri hor leh.
Ha noqon aabbe haddii duruuftu carrurtaada u geyn doonto ku-biirista maleeyshiyaad ku qubeysta webiyaal dhiigga caruuta magaaloyinka Xalab iyo Baqdaad, ama ku dul caweeya taallooyin qolfoofta madaxyo dumar ee magaaloyinka Sirta iyo Taciz. Dalalkaa waxaa buux dhaafiyey laga roonayashaas.
Ha noqon aabbe, haddii aabenimadaadu liiska aqoon-darrida ku biirin doonto, tiro horle oo aan helin fursad waxbarasho iyo mid aqoon-kororsi. Dagaalka aan cadowga kula jirno waa mid aqooneed, garasho iyo ilbaxnimo, qofkii aan haysan tiirarka dagaalkgaasi na waxa uu ahaan doonaa mid guul-darraysta, kuwaas jabay ee dib dhacay ha uga rukumin boos.
Ha noqon aabbe, duruuftu haddii caruurtaada geyn doonto qaybta shaqaaqooyinka ee xabsiyada dowladda dhaqan xumidooda iyo barbaarin la’aantooda awgeed. Ama ay buux dhaafshaan tirada derbi-jiifyada, nolashaan ugama bannaana boos dad dheeraad ku ah.
Hor iyo horraan, ha noqon aabbe haddii aad dhalaysid ilmo ku ababay xiqdi iyo nacayb ama ku asqoobay cunsurinimo xun. Dagaal u joognimo u dhashay ama ka indho-saaban arrinka ummadiisa. Noloshu waa ay ka weyn tahay in ay muhasho daan-daan ahi ina asqayso, waa inaan ka kacnaa wahab-wadareedka ina saaran oo kaalinteenna fahamnaa. Waa inaan is-daba-qabanaa, fekernaa baadinimadana ka mayranaa, itaal-darrida na ka xijaabanaa. Waa inaan u jilba-laabannaa horumarinta nafteenna, quudinta shakhsiyaddeenna arradan, nafta toosinnaa, rumaynta himilooyinkeennana u kacnaa; waxay iyagu doonayaan maahee waa inaan teenna u dhago nuglaannaa.
Taasi kama dhigna in aynu isku koobno muhasho iyo dugaashi keliya, waase baaq ku aaddan horumarinta shakhsiyaddeenna, wanaajinta nafteenna, si aan u noqono aabayaal wanaagsan, caruurtoodu na ku faanto mar-kastoo la inoo ku abtiriyo.
Xasuusnow waxaad ballan la leedahay Nebiga NNKH, aanan nasabkaaga iyo magacaaga rabin; falkaaga se ku faanaya, waxaa kugu waajiba ammintaas inaad u diyaar garowdid. Ciyaalkaaga in aad dhowrtid, si wanaagsan u hanuunisid, dhanka xaqa u jihaysid. Markaas ka gadaal aabbe noqo.
W/Q: Maxammad Nafid Qaacud
W/T: Madasha Tarjumaadda Hoobaan
Tixraaca: https://www.aljazeera.net/blogs/2016/12/31/%D9%84%D8%A7-%D8%AA%D9%83%D9%86-%D8%A3%D8%A8%D8%A7
