Casharka Nolosha

Waxaad tahay qof wanaagsan. Waxaad u qalantaa daacadnimo. Waxaad u qalantaa wanaag. Waxaad u qalantaa qof ku xushmeeya oo marnaba aan qalbigaaga been u sheegin. Waxaad u qalantaa farxad in aad hesho. Waxaad u qalantaa Jaceyl. Waxaad u qalantaa qof aan si Xun kuula dhaqmayn. Waxaad u qalantaa qof garabkaaga taagan mar kasta. Waxaad u qalantaa Nolol fiican in aad ku noolaato……
Laakiin ogsoonow had iyo jeer waxaa jiraya dad ku xumaynaya, ku xamanaya, ku ximinaya, ku xasdaya, kugu abuuraya xaalado dhibaato ah sababtoo ah si kastoo aad ugu qalanto wax kasta oo wanaagsan hadana kuma aha qasab dadka kale in ay kuula dhaqmaan sida aad rabto. Dadka dunidan ku nool waa kala duwan yihiin, qofba dabeecad gaar ah ayuu leeyahay.

Si kastoo ay tahay adigu is ahow, dad kale dartood ha u bedelin dabeecadaada, ha u dhaafin dhaqankaaga wanaagsan, ha u lumin farxadaada, ha u burburin noloshaada, ha uga tagin dadnimadaada, ha u dilin damiirkaaga.

Xusuusnow, Hadii aad ka filato in dadku oo dhan kuu noqdaan dad wanaagsan sababtoo ah adigaa wanaagsan taasi waxay ka dhigan tahay in aad ka filato Libaaxu in uusan ku cunayn sababtoo ah adiguba ma cuntid!

Mahadsanidiin

W/Q: Farah Cawaash Beeldaaje