Daryeel Magazine
Sida ay ku taliyaan xeeldheereyaasha hurdadu, dadka waa wayn ee ay da’adoodu u dhexeyso 18 illaa 60 jir waxa inay seexdaan ugu yaraan 7 illaa 9 saacadood oo hurdo ah habeen kasta.
Hurdo yaraanta iyo hurdada xad dhaafka ah waxay kordhiyaan halista niyad jabka, sonkorowga iyo wadne xanuunka.
Warka wanaagsani waa inay jiraan cabbitaanno hurdada keena, kuwaas oo dadka waa wayn ka caawin kara in ay si dhakhso ah u gam’aan. Waa kuwaan cabbitaannada ugu fiican ee hurdada kobciya.
Shaaha Chamomile:
Chamomile waa geed daweed muddo dheer aadamuhu soo isticmaalayay iyadoo loo adeegsan jiray wanaajinta hurdada, daweynta ifilada, hoos u dhigista hurka (inflammation) iyo daweynta cilladaha maqaarka.
Sida daraasaadku ay tilmaamayaan, chamomile waxaa uu wanaajiyaa tayada hurdada, waxaana uu yareeyaa welwelka iyo hurdo la’aanta. Dadka hurdo la’aanta ka cabanaya waxaa lagula taliyaan inay cabbaan shaaha chamomile (chamomile tea), waxaa ku jira walxo dejiya neerfaha.
Cabbitaanka miraha chery-ga:
Miraha cherries-ka waxay kobciyaan hurdada, sababtunta waa maadada tryptophan ee ku jirta. Tryptophan waa barootiin soo saara hormoonka “melatonin” oo door weyn ka qaata nidaaminta heerarka iyo wareegyada kala duwan ee hurdada aadamaha.
Shaaha nacnaaca (peppermint Tea):
Shaaha geedka nacnaaca, ma lahan maadada “caffeine”, sidaas darteed xilli kasta ayaad cabbi kartaa, waxaa uu caawiya cunno shiidista, waxaana uu sare u qaadaa dareenka xasiiloonida.
Digniin: Haddii aad leedahay xaaladda gaasteri ee keenta in asiidha calooshu hunguriga ku soo noqoto (Gastroesophageal reflux disease – GERD), ka dheerow shaaha nacnaaca.
Caanaha diirraan:
Shaki kuma jiro in caanuhu ay ka mid yihiin dawooyinka ugu caansan ee kobcinta tayada hurdada. Caanaha waxaa ku jira maadada “tryptophan” oo kordhisa hormoonka “serotonin”, kaas oo masuul ka ah dareenka farxadda iyo xasiiloonida. Serotonin waxa uu horudhac u yahay hormoonka “melatonin” kaas oo nidaamiya hurdada.
Wax dhibaato ma lahan inaad tijaabiso caanaha diirran hurdada ka hor, haddii aadan qabin cilladda u dulqaadasho la’aanta laktoos (lactose intolerance) ama xasaasiyadda caanaha.
